Termini ta’ impjieg

Jekk l-impjegat tiegħek hu meħtieġ li jservi perjodu ta’ probazzjoni, dan m’għandux jaqbeż is-sitt xhur. Fil-każ ta’ relazzjoni ta’ impjieg għal żmien determinat, il-perjodu ta’ probazzjoni jrid ikun proporzjonat mat-tul mistenni tal-kuntratt u t-tip ta’ xogħol. Fil-każ ta’ tiġdid ta’ kuntratt għall-istess funzjoni u kompiti, m’għandekx tagħmlu soġġett għal perjodu ta’ probazzjoni ġdid. Eċċezzjonalment, il-pajjiżi tal-UE jistgħu jistabbilixxu perjodi ta’ probazzjoni itwal fir-regolamentazzjoni nazzjonali, jekk dan ikun iġġustifikat mit-tip ta’ impjieg jew fl-interess tal-ħaddiem.

Bħala impjegatur, ma tistax tipprojbixxi lill-ħaddiema tiegħek milli jaħdmu ma’ impjegaturi oħrajn, barra mill-ħin tax-xogħol stabbilit, u ma tistax tittratta lill-ħaddiema tiegħek b’mod anqas favorevoli għax jagħmlu dan. Il-pajjiżi tal-UE jistgħu jistabbilixxu kundizzjonijiet dwar l-inkompatibbiltà tal-impjiegi paralleli, abbażi ta’ raġunijiet oġġettivi bħas-saħħa u s-sikurezza, il-kunfidenzjalità tan-negozju, l-integrità tas-servizz pubbliku jew l-evitar ta’ kunflitt ta’ interess.

Jekk toffri kuntratt bi skeda tax-xogħol irregolari, għandek:

• tagħti lill-ħaddiem tiegħek sigħat u jiem ta’ referenza predeterminati
• tinforma lill-ħaddiem tiegħek dwar inkarigu f’perjodu ta’ avviż raġonevoli stabbilit skont il-liġi, il-ftehimiet kollettivi jew il-prattika nazzjonali.

Jekk wieħed mir-rekwiżiti jew it-tnejn li huma ma jiġux sodisfatti, il-ħaddiem tiegħek għandu d-dritt li jirrifjuta assenjazzjoni tax-xogħol mingħajr konsegwenzi negattivi. Anke meta l-liġi nazzjonali tippermettilek tikkanċella inkarigu mingħajr kumpens, il-ħaddiem tiegħek hu intitolat għal kumpens skont il-liġi nazzjonali, il-ftehimiet kollettivi jew il-prattika, jekk tikkanċella inkarigu ta’ xogħol miftiehem minn qabel, wara skadenza raġonevoli speċifikata.

Jekk il-liġi nazzjonali tal-pajjiż tal-UE tiegħek tippermetti l-użu ta’ kuntratti ta’ impjieg fuq talba jew simili, u tixtieq timpjega l-istaff tiegħek b’dawn it-tipi ta’ kuntratti, għandek tkun taf li l-liġi nazzjonali tal-pajjiż tal-UE tiegħek trid tistabbilixxi miżuri biex tipprevjeni l-abbuż u l-użu ħażin tiegħu. Pereżempju, il-liġi nazzjonali tista’ tillimita l-użu u d-durata ta’ kuntratti fuq talba u kuntratti simili jew tippreżumi l-eżistenza ta’ kuntratt ta’ impjieg b’numru minimu ta’ sigħat imħallsin, li se jkun ibbażat fuq il-medja tas-sigħat maħdumin matul perjodu speċifiku.

Wara mill-anqas sitt xhur ta’ servizz u perjodu ta’ probazzjoni komplut b’suċċess (jekk applikabbli), ħaddiem jista’ jitlob forma ta’ impjieg b’kundizzjonijiet tax-xogħol aktar prevedibbli u siguri, jekk disponibbli. Għandek tagħti lil dan il-ħaddiem tweġiba motivata bil-miktub fi żmien xahar mit-talba. Il-pajjiżi tal-UE jistgħu jillimitaw il-frekwenza ta’ talbiet bħal dawn.

Jekk inti SME, jew persuna fiżika li taġixxi bħala impjegatur, f’xi pajjiżi tal-UE jista’ jkollok sa tliet xhur u tista’ tagħti tweġiba orali għal talbiet simili sussegwenti mill-istess ħaddiem jekk il-ġustifikazzjoni tibqa’ l-istess.

Jekk il-liġi tal-UE jew nazzjonali tirrikjedi li tipprovdi taħriġ lill-ħaddiema tiegħek għall-kompiti tagħhom, trid tipprovdih mingħajr ħlas. Barra minn hekk, it-taħriġ irid jingħadd bħala ħin tax-xogħol, u, jekk possibbli, isir matul il-ħinijiet tax-xogħol.

F’xi pajjiżi tal-UE ftehimiet kollettivi magħmulin f’konformità mal-liġi nazzjonali jistgħu jistabbilixxu miżuri differenti minn dawk imsemmijin hawn fuq, filwaqt li jirrispettaw il-protezzjoni ġenerali tal-ħaddiema. Xi pajjiżi tal-UE japplikaw skemi ta’ xogħol simplifikati għal staff impjegat għal massimu ta’ xahar jew anqas minn 8 sigħat fil-ġimgħa.